Samsung និង Huawei កំពុងដណ្ដើមគ្នាបញ្ចេញស្មាតហ្វូនអេក្រង់ Infinity-O នៅក្នុងខែធ្នូនេះ

តាម​ដំណឹង​ច្បាស់ការ នៅ​ពាក់កណ្ដាល​ខែធ្នូ​នេះ ក្រុមហ៊ុន​បច្ចេកវិទ្យា​ស្មា​ត​ហ្វូ​ន​យក្ស​កូរ៉េ និង​ចិន កំពុងដណ្ដើម​គ្នា​បញ្ចេញ​ស្មា​ត​ហ្វូ​ន​បំពាក់​អេក្រង់ Infinity-O លើ​ស្មា​ត​ហ្វូ​នរៀងៗខ្លូន ដោយ Samsung អាច​នឹង​បញ្ចេញ Galaxy A8s ខណៈ Huawei អាច​នឹង​ចេញ Nova 4។

តាមរយៈ​ការ​បង្ហោះ​នូវ​រូបភាព​ថ្មី​មួយទៀត​នៅលើ Weibo ដែល​ទម្លាយ​ថា ស្មា​ត​ហ្វូ​ន​ស៊េរី​ថ្មី Huawei Nova 4 របស់ខ្លួន​នឹង​បង្ហាញខ្លួន​ជា​ផ្លូវការ​នៅ​ថ្ងៃទី 17 ខែធ្នូ​ខាងមុខ ស្រប​ពេលដែល Galaxy A8s របស់ Samsung នឹង​ចេញ​កាត់មុខ​នៅ​ថ្ងៃ 10 ធ្នូ​នេះហើយ។ អេក្រង់​ទូរស័ព្ទ​ទាំងពីរ Nova 4 និង Galaxy A8s នឹង​ប្រើ​អេក្រង់ LCD ផលិត​ដោយ BOE ប៉ុន្តែ​ត្រូវគេ​រំពឹងថា ទូរស័ព្ទ​របស់ Samsung នឹងមាន​លក្ខណៈ​ទំនើប​ជាង​របស់ Huawei។

លក្ខណៈសម្បត្តិ​រំពឹង​លើ A8s នឹងមាន​អេក្រង់ 6,3 អ៊ី​ញ​កម្រិត 2340x1080px អម​ជាមួយ​សមាមាត្រ 19.5:9 ហើយ​ប្រើ​ឈី​ប Snapdragon 710 ជាមួយ​ទំហំ RAM 8GB និង​កាមេរ៉ា selfie 24MP បង្កប់​ក្នុង​អេក្រង់​មុខរប​ស់វា ស្ថិត​ចំ​ប្រឡោះ​រាង​អក្សរ​អូ ‘O’ ហើយ​នឹងមាន​កាមេរ៉ា​ក្រោយ​ភ្លោះ 3 ផងដែរ ដែល​មួយ​ជា lens ធម្មតា មួយទៀត​ជា ultra-wide និង​ទី 3 ជា depth sensor។

ដោយឡែក Nova 4 ត្រូវគេ​រំពឹងថា​នឹង​ប្រើប្រាស់​នូវ​បន្ទះ​ឈី​ប Kirin 980 ដែលជា​បន្ទះ​ឈី​ប​ដែល​ប្រើប្រាស់​នៅលើ​ស្មា​ត​ហ្វូ​ន Mate 20 series និង​ស្មា​ត​ហ្វូ​ន Honor Magic 2 ហើយ​ប្រើប្រាស់​នូវ​រ៉េ​ម​ទំហំ 6GB និង​ម៉េ​មូ​រី​ក្នុង​ម៉ាស៊ីន​ទំហំ 128GB ។ ស្មា​ត​ហ្វូ​ន​នេះ​មិន​ប្រើប្រាស់​នូវ​ប្រព័ន្ធ​ស្កេ​ន​ក្រ​យ៉ៅ​ដៃ Fingerprint Sensor នោះទេ​នៅ​ផ្នែក​ខាងមុខ និង​ផ្នែក​ខាងក្រោយ​របស់​វា ប៉ុន្តែ​វា​មានការ​ប៉ាន់​ស្មានថា​ស្មា​ត​ហ្វូ​ន​នេះ​នឹង​ប្រើប្រាស់​នូវ​ប្រព័ន្ធ​ស្កេ​ន​ក្រ​យ៉ៅ​ដៃ​ក្រោម​អេក្រង់​បាន៕