ថ្មីៗនេះ គេហទំព័រ Redmondpie បានចុះផ្សាយថា ក្រុមហ៊ុន Samsung បានប្រើរូបភាពដែលថតដោយកាមេរ៉ាអាជីព DSLR បន្លំថាជារូភាពដែលថតបានពីទូរស័ព្ទ Galaxy A8 Star សម្រាប់ដាក់អួតលើទំព័រវេបសាយដែលនិយាយពីទូរស័ព្ទខ្លួន។
ការរកឃើញកំហុសដ៏ធំនេះ ធ្វើឲ្យបន្ទាប់ពីគេដឹងថា រូបភាពដែលក្រុមហ៊ុន Samsung បានដាក់លើគេហទំព័រដែលនិយាយពី Galaxy A8 Star គឺត្រូវបានទិញសេវាកម្មលក់រូបភាព EyeEm ដោយបានថតដោយអ្នកស្រី Dunja Djudjic ជាអ្នកថតរូបអាជីពមួយរូប។
ជាមួយគ្នានេះ នៅលើគេហទំព័ររបស់អ្នកស្រី Djudjic និយាយថា៖ ក្រុមហ៊ុន Samsung បានប្រើរូបភាពចេញពីកាមេរ៉ា DSLR របស់ខ្ញុំ បោកថាជារូបភាពថតចេញពីស្មាតហ្វូន ដោយប្រើមុខងារ “Portrait Mode”។
សម្រាប់រូបថតមួយសន្លឹកនោះ ត្រូវបាន Dunja Djudjic ដាក់លក់ក្នុងតម្លៃ ៣ ជម្រើសផ្សេងគ្នាដោយ សម្រាប់ការប្រើក្នុងបណ្ដាញសង្គមមានតម្លៃ ២០ ដុល្លារ និងវេបសាយ ៥០ ដុល្លារ ប៉ុន្តែបើប្រើពេញលក្ខណៈតែម្ដងមានតម្លៃ ២៥០ ដុល្លារ។
ចំពោះករណីនេះ គេហទំព័របស់ Samsung ក៏បានធ្វើការកំណត់សម្គាល់មួយផងដែរថា” រូបភាពទាំងនោះ គ្រាន់តែជារូបតំណាងយុទ្ធនាការផ្សព្វផ្សាយតែប៉ុណ្ណោះ” ។ នេះមានន័យថា រូបថតដែលបង្ហោះលើវេបសាយទាំងនោះ គឺមិនមែនជារូបភាពដែលបានថតចេញពីកាមេរ៉ាទូរស័ព្ទនោះទេ៕
