តុលាការចិនមួយបានចេញសេចក្ដីបង្គាប់បឋម ដែលនឹងហាមឃាត់ការលក់ទូរស័ព្ទដៃ iPhone ស៊េរីមុនៗរបស់ក្រុមហ៊ុន Apple នៅក្នុងប្រទេសចិន តបតាមពាក្យបណ្ដឹងរបស់ក្រុមហ៊ុនផលិតបន្ទះឈីបអាមេរិក Qualcomm។
ការសម្រេចចិត្តនេះត្រូវបានគេមើលឃើញថា ជាឆ្លើយតបមួយបន្ទាប់ពីមានបញ្ហាជម្លោះពាណិជ្ជកម្មរហូតមានឈានដល់ការចាប់ខ្លួនប្រធានហិរញ្ញវត្ថុរបស់ក្រុមហ៊ុន Huawei លោក Meng Wanzhou ដែលជាកូនស្រីអាយុ ៤៦ ឆ្នាំរបស់ស្ថាបនិកក្រុមហ៊ុននេះត្រូវបានឃុំខ្លួននៅក្នុងប្រទេសកាណាដា។ នេះបើតាមការចេញផ្សាយដោយសារព័ត៌មាន Russian Today នៅរសៀលថ្ងៃអង្គារ ទី១១ ខែធ្នូ ឆ្នាំ២០១។
ចំពោះការផ្អាកនេះ Qualcomm និង Apple មានជម្លោះនឹងគ្នាអស់រយៈពេលច្រើនឆ្នាំមកហើយ ជុំវិញកម្មសិទ្ធិបញ្ញា។ ដោយឡែក នៅក្នុងសេចក្ដីបង្គាប់របស់តុលាការចិន ក្រុមហ៊ុន Qualcomm បានអះអាងថា ក្រុមហ៊ុន Apple បានរំលោភប័ណ្ណប៉ាតង់កម្មសិទ្ធិបញ្ញា ផ្នែកបច្ចេកវិទ្យាចំនួនពីររបស់ខ្លួន ដែលត្រូវបានប្រើប្រាស់នៅក្នុងទូរស័ព្ទ ដូចជា Phone 6S, iPhone 6S Plus, iPhone 7, iPhone 7 Plus, iPhone 8, iPhone 8 Plus និង iPhone X។
ម្យ៉ាងវិញទៀត បើសិនជាសេចក្ដីបង្គាប់ខាងលើត្រូវបានអនុវត្តមែន នោះទូរស័ព្ទម៉ូឌែលទាំងនេះនឹងត្រូវហាមឃាត់ក្នុងការលក់នៅក្នុងប្រទេសចិន ជាទីដែលក្រុមហ៊ុនម៉ាកសញ្ញាផ្លែប៉ោមមួយនេះ គ្រប់គ្រងទីផ្សារជិត ២៥ភាគរយ បើគិតពីតួលេខកាលពីចុងឆ្នាំ២០១៨។ តែទោះជាយ៉ាងនេះក្ដី ក្រុមហ៊ុន Apple បានច្រានចោលការអះអាងរបស់ Qualcomm ដោយបញ្ជាក់ថា ទូរស័ព្ទដៃរបស់ខ្លួននៅតែមានវត្តមានក្នុងទីផ្សាររបស់ចិន ហើយថាសេចក្ដីបង្គាប់មានជាប់ពាក់ព័ន្ធតែទូរស័ព្ទ iOS ស៊េរីចាស់ៗតែប៉ុណ្ណោះ៕
