រាជធានីភ្នំពេញ៖ ទូរស័ព្ទ Nokia 8110 តម្លៃថោក កំពុងធ្វើឲ្យអ្នកប្រើប្រាស់មួយចំនួនរងគ្រោះ ព្រោះទិញប៉ះចំផលិតផលក្លែងក្លាយបណ្ដាលឲ្យខក់ចិត្ត និងបាត់បងផលប្រយោជន៍ដែលខ្លួនរំពឹងទុក។ ទូរស័ព្ទ Nokia 8110 4G តម្លៃដើម 69 ដុល្លារ ត្រូវបានគេលួចចម្លងផលិតឡើងវិញមកលក់ត្រឹមតែ 20 ដុល្លារ ដែលជាតម្លៃថោកខ្លាំង។
Nokia 8110 ឬទូរស័ព្ទ Nokia ចេក ត្រូវបានក្រុមហ៊ុន HMD Global ដែលជាក្រុមហ៊ុនផលិត និងចែកចាយទូរស័ព្ទដៃ Nokia រចនាឡើងវិញ ដោយបំពាក់នូវមុខពិសេសជាច្រើនប្លែកកាលពី 20 ឆ្នាំមុន។
Nokia 8110 ភ្ជាប់មកជាមួយនូវភាពប៉ិនប្រសប់ដែលអ្នករំពឹងពីទូរស័ព្ទ Nokia និងផ្តល់នូវភាពរឹងមាំ ជឿជាក់ជាស្តង់ដារ។ សម្រាប់ការ តេចេញ/ចូល ទូរស័ព្ទនេះប្រើនូវប្រព័ន្ធ VoLTE ផ្ដល់នូវសំឡេងច្បាស់ និងល្អឥតខ្ចោះសម្រាប់អ្នកដែលចង់បានទូរស័ព្ទប៊ូតុងដែលបំពាក់ដោយប្រព័ន្ធ 4G នៅក្នុងដៃ។ វាមានអេក្រង់ 2.4 អ៊ីង នេះអាចប្រើប្រាស់បានស៊ីម 2 ជាមួយអង្គផ្ទុកទិន្នន័យ 512MB និងអាចបន្ថែមអង្គចងចាំបានរហូតដល់ 64GB ជាមួយទំហំកាមេរ៉ា 2 មេហ្គាភិសែល ដែលមានថាមពលថ្មកាន់បានដល់ទៅ 20 ម៉ោង និងនិយាយទូរស័ព្ទបានរហូតដល់ទៅ 8 ម៉ោង។
ក្រៅពីនេះ វាក៏មានសមត្ថភាពប្រើប្រាស់កម្មវិធីពេញនិយមដូចជាជំនួយការ Google (Google Assistant) Google Search ផែនទីរបស់ Google (Google Maps) និង Facebook បន្ថែមពីនេះ អាចផ្ញើ និងទទួលអ៊ីម៉ែល ឬ Contact និង Calendar ដែលបាន sync ជាមួយ Gmail និង Outlook.com។ បន្ថែមពីនោះ យើងក៏អាចប្រើទូរស័ព្ទ Nokia 8110 4G សម្រាប់ការចែករំលែកអ៊ីនធឺណិត WiFi (Wireless Hotspot) ចេញពីទូរស័ព្ទនេះផ្ទាល់លើប្រព័ន្ធ 4G LTE បានយ៉ាងរលូន ជំនួសឲ្យការប្រើដុំអ៊ីនធឺណិតចល័តផងដែរ។
ដោយឡែកសម្រាប់ទូរស័ព្ទ Nokia 8110 ក្លែងក្លាយ ត្បិតមានរូបរាងដូចទូរស័ព្ទពិតប្រាកដពីក្រុមហ៊ុនក៏ពិតមែន ប៉ុន្តែសមត្ថភាពរបស់វាអាចប្រើបានស្មើ ឬទាបជាទូរស័ព្ទ N ចុចធម្មតាមួយតែប៉ុណ្ណោះ។ ក្នុងនោះ គុណភាពរបស់ទូរស័ព្ទក្លែងក្លាយ ក៏អន់ជាង ប្រើមិនធន់ នាំឲ្យឆាប់ខូចផងដែរ។ ដូច្នេះសម្រាប់ប្រិយមិត្តដែលទិញទូរស័ព្ទ Nokia 8110 4G ត្រូវរកមើលស្ទិកគ័រ KTH នៅលើប្រអប់ លើទូរស័ព្ទ និងនៅលើថ្មទូរស័ព្ទ ដើម្បីបញ្ជាក់ថាវាជាផលិតផលសុទ្ធពីក្រុមហ៊ុនដែលមានការធានារយៈមួយឆ្នាំពេញ៕
