រាជធានីភ្នំពេញ៖ HMD Global ដែលជាក្រុមហ៊ុនផលិត និងចែកចាយទូរស័ព្ទ Nokia បានប្រកាសជាផ្លូវការហើយកាលពីថ្ងៃ ២០ ខែធ្នូ ឆ្នាំ ២០១៨ ក្នុងការដាក់ចេញស្មាតហ្វូនក្បាលឆកថ្មីទូរស័ព្ទ Nokia 5.1 Plus សម្រាប់ទីផ្សារកម្ពុជា ជាមួយនឹងតម្លៃ ២១៩ ដុល្លារ ដោយមានថែមជូនស្រោមការពារ ស្គ្រីនការពារអេក្រង់ និងកាបូប Nokia ដ៏ស្រស់ស្អាតមួយ។
លោក គៀង សុខផេង អ្នកគ្រប់គ្រងក្រុមហ៊ុន HMD Global ប្រចាំនៅប្រទេសកម្ពុជា និងឡាវ បានប្រាប់អ្នកយកព័ត៌មានរបស់គេហទំព័រ The Plus News តាមរយៈទូរស័ព្ទថា៖ ក្រុមហ៊ុនចង់នាំយកស្មាតហ្វូនតម្លៃសមរម្យ ជាមួយនឹងសមត្ថភាពដំណើរការលឿន ដើម្បីផ្គាប់ចិត្តអតិថិនកម្ពុជា បន្ទាប់ពីទទួលជោគជ័យយ៉ាងសម្បើមលើម៉ូឌែលជាច្រើនកន្លងមក ដូចជា Nokia 6, Nokia 6 (2018), Nokia 7 plus, Nokia 2.1, Nokia 6.1 Plus និងទូរស័ព្ទស្មាតហ្វូនមួយចំនួនទៀត។
អ្នកគ្រប់គ្រងខាងលើបន្ថែមថា សម្រាប់ទូរស័ព្ទ Nokia 5.1 Plus ជាស្មាតហ្វូនដែលមានអេក្រង់ក្បាលឆកដូច Nokia 6.1 Plus ដែរ ប៉ុន្តែមានសមត្ថភាពទាបជាងបន្តិច។ ទូរស័ព្ទនេះ ប្រើអេក្រង់ 5.86 អ៊ីញ ប្រភេទកោង 2.5D អាចបង្ហាញរូបភាព HD+ 720×1520 ភិចសែល។ ស្មាតហ្វូននេះប្រើប្រាស់នូវបន្ទះឈីប MediaTek Helio P60 SoC មាន Ram ទំហំ 3GB និងទំហំផ្ទុក 32GB ហើយមានថាមពលថ្មដូចគ្នាទៅនឹងស្មាតហ្វូន Nokia 6.1 Plus គឺ 3,060mAh។
ចំពោះកាមេរ៉ា Nokia 5.1 Plus ប្រើកាមេរ៉ាភ្លោះ 13MP+5MP នៅផ្នែកខាងក្រោយលើកម្រិត Aperture f/2.0 និងមានកាមេរ៉ាខាងមុខទំហំ 8MP ជាមួយនឹងកម្រិត Aperture f/2.2 និងដំណើរការនូវប្រព័ន្ធប្រតិបត្តិការ Android 8.1 ហើយអាចធ្វើការ Update ទៅកាន់ Android 9 Pie ក្នុងពេលឆាប់ៗនេះដែរ។
ទូរស័ព្ទ Nokia 5.1 Plus មានលក់នៅទីផ្សារកម្ពុជាហើយ ចាប់ពីថ្ងៃទី ២០ ខែធ្នូ ឆ្នាំ ២០១៨ នេះតទៅដោយប្រិយមិត្តទាំងអស់អាចរកជាវបាននៅតាមហាងលក់ទូរស័ព្ទទូទាំងប្រទេស។ សម្រាប់ព័ត៌មានបន្ថែមសូមទាក់ទងលេខ 012879 707៕
