កាលពីពេលថ្មីៗនេះ ក្រុមហ៊ុន Microsoft បានចេញលក់ Surface Go ដើម្បីផ្គាប់ចិត្តអ្នកប្រើប្រាស់ជាមួយនឹងតម្លៃធូសមរម្យត្រឹម ៥៣០ ដុល្លារសម្រាប់ម៉ូឌែលទំហំ ៦៤GB និង ៦៩៨ ដុល្លារសម្រាប់ម៉ូឌែលទំហំ ១២៨ GB។
Surface Go ពេលនេះមានលក់ជាពិសេសមុនគេនៅហាង Flipkart។ វានឹងមានលក់ផ្លូវការចាប់ពីថ្ងៃទី២៧ ខែធ្នូនេះតទៅនេះ ដោយបច្ចុប្បន្នអតិថិជនអាចចាប់ផ្ដើមកុម្ម៉ង់បាន ដោយវាជាថេប្លេត Windows 10 ស៊េរីចុងក្រោយ ហើយក្រុមហ៊ុនផលិតវាឡើងអមជាមួយលក្ខណៈសម្បត្តិមធ្យម ដើម្បីកម្រិតតម្លៃធូរ ងាយស្រួលលុកទីផ្សារឥណ្ឌា និងតម្រូវអតិថិជនដែលត្រូវការ Surface តម្លៃទាប។
Surface Go បំពាក់មកជាមួយ CPU ប្រភេទ dual-core Intel Pentium Gold 4415Y ល្បឿន 1.6GHz ជាមួយក្រាហ្វិក Intel HD Graphics 615។ អង្គចងចាំមានទំហំ 64GB អមដោយ Ram 4GB និងមានម៉ូដែល 128GB អមដោយ RAM 8GB ទៀតផង។ ទោះជាយ៉ាងណា ខណៈអង្គចងចាំ 128GB ជាប្រភេទ SSD Flash Storage ចំណែកម៉ូដែល 64GB ប្រើត្រឹម eMMC ដែលមានល្បឿនយឺតជាង SSD បន្តិច។
ចំពោះប្រព័ន្ធតំណភ្ជាប់នៅលើ Surface Go នេះវិញ មកភ្ជាប់មកដូចជា 1x USB-C, 1x Surface Connect port, microSDXC card slot និង 3.5mm headphone jack។ អេក្រង់ថេប្លេត Windows 10 ថ្មីនេះមានទំហំ ១០អ៊ីញ 3:2 panel ជាមួយកម្រិត resolution នៅ 1800×1200 ហើយទ្រទ្រង់ 10-point multi-touch និងក្រាលដោយកញ្ចក់ការពារ Corning Gorilla Glass 3។
Surface Go បានបំពាក់កាមេរ៉ាក្រោយទំហំ 8MP ហើយខាងមុខទំហំ 5MP និងមានប្រព័ន្ធ 2W stereo speaker អមដោយបច្ចេកវិទ្យា Dolby Audio Premium ថែមទៀត។ ថេប្លេតនេះក៏អាចប្រើបានជាមួយស្រោម Surface Go Signature Type Cover និងគាំទ្រប្រើប៊ិច Surface Pen ផងដែរ។ សម្រាប់ស្រោម Type Cover ត្រូវបានក្រុមហ៊ុនដាក់លក់ដោយឡែកដែលមានតម្លៃ ១៦៥ ដុល្លារ។ យ៉ាងណាមិញ Surface Go ត្រូវបានក្រុមហ៊ុនផលិតផលសម្រាប់តែទីផ្សារប្រទេសឥណ្ឌា តែប៉ុណ្ណោះ៕
