រាជធានីភ្នំពេញ៖ កាលពីយប់ថ្ងៃទី ២២- ២៣ ខែធ្នូ ឆ្នាំ ២០១៨ ក្រុម ROG ដែលឈរក្រោមស្លាកយីហោ ASUS បានរៀបចំកម្មវិធី LAN PARTY ដែលជាការលេងហ្គេម និងប្រកួតហ្គេមដាច់យប់នៅ TK BattleGround ដាច់យប់ចាប់ពីម៉ោង ៦ ល្ងាច ដល់ម៉ោង ៦ ព្រឹកវិញ។
ក្នុងព្រឹត្តិការណ៍នោះមានការប្រកួតហ្គេមចំនួន ៣ រួមមាន៖ PUBG, CS:Go, និង DOTA2 ដែលហ្គេមទាំងនេះសុទ្ធសឹងជាហ្គេមល្បី និងកំពុងពេញនិយមខ្លាំងសម្រាប់អ្នកលេងហ្គេមទាំងឡាយ។ លើសពីនេះទៅទៀត ក្រុមហ៊ុន ROG ប្រចាំប្រទេសកម្ពុជាបានត្រៀមទឹកប្រាក់សរុបចំនួន ១,២០០ ដុល្លាសម្រាប់អ្នកឈ្នះ និងមានកាដូស្អាតៗជាច្រើនទៀត។
មិនតែប៉ុណ្ណោះយើងឃើញមានវត្តមានរបស់ Youtuber ល្បីៗមួយចំនួនបានចូលរួមដើម្បីលេងហ្គេម និងចួលរួមសប្បាយជាមួយអ្នកគាំទ្ររបស់ខ្លួនដូចជាBroKH, Sdach Game, Raven Blaze, Rean Thort (ពួជ្រួញ) និងតារាកត្តិយសជាច្រើនរូបទៀត ដែលទាំងនេះបញ្ជាក់ថាវិស័យកីឡាអេឡិចត្រូនិចកម្ពុជាកាន់តែទទួលបានការចាប់អារម្មណ៍ជាច្រើនពីសំណាក់អតិថិជន ក៏ដូចជាប្រជាជនកម្ពុជាទាំងមូល។
គួរបញ្ជាក់ផងដែរថានេះគឺជាលើកទីមួយហើយដែលប្រទេសកម្ពុជាបង្កើតនូវព្រឹត្តិការណ៍លេងហ្គេមដាច់យប់នេះ (ROG LAN PARTY)។ តាមប្រសាសន៍របស់លោក Jeremy PENG ដែលជាអ្នកគ្រប់គ្រងROG Component ប្រចាំប្រទេសកម្ពុជាបានបញ្ជាក់ថា លោកពិតជាមានសេចក្តីរីករាយយ៉ាងក្រៃលែងដែលប្រទេសកម្ពុជានេះមានទីផ្សារដែលមានសក្តានុពល និងមានការគាំទ្រជាច្រើនទៅលើផលិតផលROGកន្លងមក។
លោកនឹងខិតខំប្រឹងប្រែងឲ្យអស់ពីសមត្ថភាពក្នុងការដឹងនាំក្រុម ដើម្បីបំពេញតំរូវការប្រទេសកម្ពុជានេះឲ្យមានការអភិវឌ្ឍលើវិស័យកីឡាអេឡិចត្រូនិចនេះឲ្យមានភាពជឿនលឿន និងដើរទាន់ទីផ្សារពិភពលោកខាងក្រៅដោយនាំចូលនូវផលិតផលដែលមានគុណភាពល្អៗ រួមទាំងបច្ចេកវិទ្យាទំនើបដែលមានតម្លៃសមរម្យផងដែរ៕
