បន្ទាប់ពីក្រុមហ៊ុនជាច្រើនបានប្រកាសនឹងបង្ហាញខ្លួនផលិតផលថ្មីៗជាច្រើននៅក្នុងសមាជទូរស័ព្ទពិភពលោក MWC 2019 នៅពេលខាងមុន ក្រុមហ៊ុន Nokia ឯណោះវិញ ក៏បានបង្ហើបឲ្យដឹងដែលថា ខ្លួនក៏នឹងមានសមិទ្ធផលថ្មីបង្ហាញក្នុងព្រឹត្តិការណ៍ប្រចាំឆ្នាំនេះដែរ។
តាមរយៈការប្រកាសនេះ Nokia ត្រូវបានទាយទុកថា អាចនឹងដាក់ចេញនូវទូរស័ព្ទភ្នែកម្នាស់ ដែលវាជាកំពូលស្មាតហ្វូនរបស់ Nokia សម្រាប់វាយលុកទីផ្សារឆ្នាំ 2019 នេះ។ ដោយសមាជ MWC 2019 នេះនឹងចាប់ផ្ដើមប្រារព្ធធ្វើពីថ្ងៃទី២៤ ខែកុម្ភៈនៅឯទីក្រុងបាសេឡូណា ហើយដំណឹងនេះត្រូវបានប្រកាសដោយផ្ទាល់ចេញពីមាត់ប្រធានផ្នែកផលិតផលរបស់ HMD Global នៅលើបណ្ដាញសង្គម Twitter ដូចការលើកឡើងខាងក្រោម។ ដូច្នេះហើយ សាធារណជនមានការរំពឹងនឹងបានឃើញស្មាតហ្វូនស៊េរីថ្មីរបស់ Nokia ក្នុងអំឡុងព្រឹត្តិការណ៍ MWC 2019 ខាងមុខ ហើយក្នុងនោះអាចនឹងមានវត្តមាន Nokia 9 ផងដែរ។
Nokia 9 ត្រូវគេរំពឹងថា នឹងបំពាក់កាមេរ៉ាតម្រៀបជារាងពហុកោណ អាចប្រើបច្ចេកវិទ្យា PureView និងមានមុខងារ Night mode សម្រាប់ថតភ្លឺច្បាស់ទោះនៅទីងងឹត។ ម៉ូដែលស្តង់ដារត្រូវគេរាយការណ៍ថា នឹងប្រើអេក្រង់ OLED ហើយបង្កប់មុខងារស្កេនក្រយៅដៃក្នុងអេក្រង់។ Nokia 9 ស្មាតហ្វូនកាមេរ៉ាក្រោយ 5 ដែលប្រើឈីប S845 នឹងមានលក់ក្នុងតម្លៃប្រហែល 6000យន់ ឬប្រហែល 885 ដុល្លារ៕
