កម្ពុជាស្នើឲ្យធនាគារ ADB ជួយអភិវឌ្ឍន៍ធនធានមនុស្សផ្នែកបច្ចេកវិទ្យាគមនាគមន៍ និងព័ត៌មាន

ភ្នំពេញ: រដ្ឋមន្ត្រីក្រសួង​ប្រៃសណីយ៍ និង​ទូរគមនាគមន៍​បាន​លោក ត្រាំ អ៊ីវតឹក នៅ​ថ្ងៃទី ០៥ កុម្ភៈ​នេះ​បាន ស្នើ​សុំឱ្យ​ធនាគារអភិវឌ្ឍន៍អាស៊ី​បន្ដ​ជួយ​អភិវឌ្ឍន៍​ធនធានមនុស្ស​ផ្នែក​បច្ចេកវិទ្យា​គមនាគមន៍ និង​ព័ត៌មាន ដើម្បី​លើក កម្ពស់​បច្ចេកទេស​ជំនាញ​ឱ្យ​កាន់តែ​ប្រសើរ​ថែមទៀត។

ការលើកឡើង​នេះ ក្នុងជំនួប​ពិភាក្សា​ការងារ​ជាមួយ​មន្ត្រីជាន់ខ្ពស់​ធនា​គារ​អភិវឌ្ឍន៍អាស៊ី ដើម្បី​ពិភាក្សា​អំពី​អាទិភាព សំខាន់ៗដែល​រាជរដ្ឋាភិបាល​កម្ពុជា​ក៏ដូចជា​ក្រសួង​ប្រៃសណីយ៍ និង​ទូរគមនាគមន៍ បាននិងកំពុង​យកចិត្តទុកដាក់ ដើម្បី ត្រៀមខ្លួន​សម្រាប់​សេដ្ឋកិច្ច​ឌីជីថល និង​បដិវត្តន៍​ឧស្សាហកម្ម​ជំនា​ន់ទី។

តាម​ការចេញផ្សាយ​រប​ស់​ក្រសួង​ប្រៃសណីយ៍ និង​ទូរគមនាគមន៍​បង្ហាញ​ថា លោក ត្រាំ អ៊ីវតឹក បានស្នើ​ឲ្យ​ស្ថាន​ប័ន​នោះ​ជួយ​រៀបចំ​គោលនយោបាយ បទដ្ឋាន​គតិយុត្ត​នានា ដើម្បី​ទ្រទ្រង់​ហិរញ្ញវត្ថុ​ឌីជីថល រដ្ឋាភិបាល​ឌីជីថល E-Commerce ការអភិវឌ្ឍ​ធនធានមនុស្ស ការតភ្ជាប់​ឌីជីថល ការពង្រីក​វិសាលភាព​នៃ​សេវា​ប្រៃសណីយ៍​ជាដើម គឺជា​កិច្ចការសំខាន់ៗ ដែល​ក្រសួង​បាន និង​កំពុង​ផ្តោត​ការយកចិត្តទុកដាក់។

លោក​បន្តថា លោក​សុំ​បន្ត​កិច្ចសហប្រតិបត្តិការ​បន្ថែម​ទៀត លើ​គម្រោង​ដែល​ADB បាន​អនុវត្តន៍ និង​សម្រេចបាន​នៅក្នុង​តំណាក់កាល​កន្លង​មក ដូចជា គម្រោង​កាត់បន្ថយ​ភាពក្រីក្រ និង​អភិវឌ្ឍន៍​កសិកម្ម​នៅ​ជុំវិញ​តំបន់​បឹង​ទន្លេសាប​ជាដើម ជាពិសេស​ការបណ្ដុះបណ្ដាល​ធនធានមនុស្ស​ផ្នែក​បច្ចេកវិទ្យា​គមនាគមន៍ និង​ព័ត៌មាន។

លោក​រដ្ឋមន្ត្រី ក៏បាន​លើក​អំពី​ស្ថានភាព​បច្ចុប្បន្ន​និង​ការរីកចម្រើន​នៃ​វិស័យ​បច្ចេកវិទ្យា​គមនាគមន៍​និង​ព័ត៌មាន ទូរគមនាគមន៍ និង​ប្រៃសណីយ៍ ដែល​បច្ចុប្បន្ន​បណ្ដាញ​ខ្សែ​កា​ប្លិ៍​អុ​ប​ទិ​កមាន​ប្រវែង​ជាង៤០.០០០គីឡូម៉ែត្រ ទូទាំងប្រទេស។

លោកស្រី Sunniya Durrani-Jamal នាយិកា​ធនាគារអភិវឌ្ឍន៍អាស៊ី​ប្រចាំ​ព្រះរាជាណាចក្រ​កម្ពុជា បាន​កោតសរសើរ​ចំពោះ​ក្រសួង​ប្រៃសណីយ៍ និង​ទូរគមនាគមន៍ និង​រាជរដ្ឋាភិបាល​កម្ពុជា​ដែល​បាន​ខិតខំ​ប្រឹងប្រែង​អភិវឌ្ឍន៍​ប្រទេស​កន្លងមក ហើយ​ធនាគារអភិវឌ្ឍន៍អាស៊ី​គឺជា​ដៃគូ​អភិវឌ្ឍន៍​យុទ្ធសាស្ត្រ​របស់​រាជរដ្ឋាភិបាល​កម្ពុជា។

លោកស្រី​បាន​បន្ដថា បេសកកម្ម​ចម្បង​មក​កម្ពុជា​នេះ​គឺ​ដើម្បី​ជួបពិភាក្សា​ការងារ​ជាមួយ​បណ្ដា​មន្ត្រីជាន់ខ្ពស់​នៃ​ព្រះរាជាណាចក្រ​កម្ពុជា ក្នុងការ​ពិភាក្សា​ការងារ​និង​ប្រមូល​ធាតុ​ចូល​សម្រាប់​ការរៀបចំ​ចងក្រង​ផែនការ​យុទ្ធសាស្ត្រ​នៃ​ភាពជា​ដៃគូ២០១៩-២០២៣ខាងមុខ៕