រាជធានីភ្នំពេញ៖ តាមការចុះផ្សាយរបស់ការិយាល័យឆ្លើយតបបញ្ហាបន្ទាន់នៃកុំព្យូទ័រ (CamCERT)ថិតនៅក្រោមនាយកដ្ឋានសន្តិសុខបច្ចេកវិទ្យាគមនាគមន៍ និងព័ត៌មាន នៃអគ្គនាយកដ្ឋានបច្ចេកវិទ្យាគមនាគមន៍ និងព័ត៌មាន នៃក្រសួងប្រៃសណីយ៍ និងទូរគមនាគមន៍ បានឲ្យដឹងកាលពីកន្លងមកនេះថា Email បោកប្រាស់កំពុងរាលដាល ចូលទៅក្នុងប្រអប់សារអ្នកប្រើប្រាស់កម្ពុជា ដែលជាសញ្ញាមួយនៃការបោកប្រាស់តាមរយៈបច្ចេកវិទ្យា ដែលវាចេញមកជាទម្រង់ផ្សេងៗ ដែលអ្នកគួរប្រុងប្រយ័ត្ន។
សេចក្ដីព័ត៌មានរបស់ CamCERT បានឲ្យដឹងថា ចោរបច្ចេកវិទ្យាតែងប្រើប្រាស់វិធីផ្សេងៗ ដូចជាការផ្ញើអ៊ីម៉ែលទៅអ្នក ដោយបញ្ជាក់ថា អ៊ីម៉ែលត្រូវបានគេលួច ដែលតម្រូវឲ្យអ្នកធ្វើការផ្លាស់ប្ដូរ ឬការផ្ញើតំណរ Link ពីផលិតផល ឬក៏ការផ្ដល់សំណាងណាមួយ។ ជាមួយគ្នានេះ ដើម្បីសុវត្ថិភាព៖
- ការប្រើប្រាស់ពាក្យសម្ងាត់ដែលខ្លាំង (អាចចាប់ ពី 8 តួអក្សរឡើងទៅ ដែលមានតួអក្សរតូច ធំ លេខ និងនិមិត្តសញ្ញាបញ្ចូលគ្នា)
- ប្រើប្រាស់កម្មវិធីគ្រប់គ្រងពាក្យសម្ងាត់ ដើម្បីធានាថាគណនីនិមួយៗរបស់អ្នកមានពាក្យសម្ងាត់ខ្លាំង ហើយផ្សេងៗគ្នា
- បើកមុខងារសន្តិសុខពីរជាន់ (Two-Factor Authentication) សម្រាប់គណនីដែលត្រូវការពារ
- អ្នកក៏គួរតែបិទនូវ WebCam របស់អ្នក បើសិនជាអ្នកមិនបានប្រើប្រាស់នោះទេ
- អ្នកមិនគួរចុះឈ្មោះ ឬប្រើប្រាស់វេបសាយណា ដែលមិនគួរឲ្យទុកចិត្ត ឬគ្មានប្រភពច្បាស់លាស់
- មិនគួរទាញយក ឬប្រើប្រាស់ម្មវិធី Creak ដែលវានាំឲ្យពពួកមេរោគចូលវាយលុកកុំព្យូទ័រ៕
