ស្របពេលដែលថ្ងៃប្រារព្វកម្មវិធីជិតចូលមក នៅថ្ងៃទី 20 ខែកុម្ភៈ ខាងមុខ ក្រុមហ៊ុន Xiaomi ស្រាបតែបង្ហើយស្ទើរគ្មានសល់នូវលក្ខណៈសម្បត្តិកប់ៗរបស់ទូរស័ព្ទ Mi 9 ទាំងរូបរាងរបស់វា និងចំណុចខ្លាំងមួយចំនួនទៀត ធ្វើឲ្យអ្នកគាំទ្រគ្រឺតជើងធ្មេញមិនស្ទើរនោះទេ។
ក្រុមហ៊ុន Xiaomi បានឲ្យដឹងថា ទូរស័ព្ទ Mi 9 នឹងប្រើប្រាស់បន្ទះឈីប Snapdragon 855 (7nm) ជាជំនាន់ចុងក្រោយរបស់ Qualcomm ជាមួយនឹងការបំពាក់សេវាអ៊ីនធើណេតទៅ 5G។ តាមរយៈការបង្ហើបនេះ បានឲ្យដឹងថាបន្ទះឈីប Snapdragon 855 មាន CPU ចំនួន 8 គ្រាប់ ដែលវានឹងមានដំណើរការលឿនជាងឈីប Snapdragon 845 ដល់ទៅ 45% និង GPU Adreno 640 វានឹងខ្លាំងជាមុន 20%។
Mi 9 នឹងបំពាក់អេក្រង់ទំហំ 6.4 អ៊ីញ ជាប្រភេទ AMOLED ផលិតដោយក្រុមហ៊ុន Samsung អាច បង្ហាញរូបភាព 1080 x 2220 ភិចសែល កម្រិតពន្លឺ 600 nits ហើយមានផ្ទៃអេក្រង់លាតធំ 90.7% ដោយប្រើម៉ូតតំណក់ទឹកដដែល។
ចំពោះមុខងាស្កេនលើអេក្រង់វិញ ខាង Xiaomi បានបញ្ជាក់ថា វានឹងលឿនជាងការស្កេននៅលើ Mi 8 ជំនាន់មុន ដល់ទៅ 25% ឯណោះ។ Mi 9 នឹងមានកាណុងកាមេរ៉ាចំនួន 3 គ្រាប់ នៅខាងខាងក្រោយ មានទំហំ 48 មេហ្គាភិចសែល ជាកាមេរ៉ាគោល + 13 មេហ្គាភិចសែល ជាលេន Telephoto + 16 មេហ្គាភិចសែល ជាលេន ultra-wide angle។
Mi 9 នឹងមានជម្រើសរ៉េម 6GB + អង្គផ្ទុកទិន្នន័យ 128GB និងរ៉េម 8GB + អង្គផ្ទុកទិន្នន័យ 256GB ហើយវានឹងមានជម្រើសពិសេសមួយទៀត អាចនឹងបំពាក់នៅលើ Mi 9 Explorer Edition ជាមួយទំហំរ៉េម 10GB + អង្គផ្ទុកទិន្នន័យ 512GB៕
