រឿងរ៉ាវកូនស្រីរបស់ប្រធានក្រុមហ៊ុនបច្ចេកវិទ្យាយក្សចិន Huawei ដែលត្រូវចាប់ខ្លួននៅក្នុងប្រទេសកាណាដា នៅមិនទាន់មានដំណឹងអ្វីទេផ្សេងទេ ប៉ុន្តែថ្មីៗនេះ មានព័ត៌មានមួយចុះផ្សាយថា លោកស្រី ម៉េង វ៉ានចូវ (Meng Wanzhou) គឺជាអ្នកគាំទ្រផលិផល Apple ផ្កាប់មុខ ខណៈពេលចាប់ខ្លួន គេឃើញអ្នកស្រីកាន់ឱបទូរស័ព្ទ iPhone, iPad និងកុំព្យូទ័រ MacBook Air ពេញដៃ។
យោងតាមរបាយការណ៍តុលាការបានបង្ហាញថា លោកស្រី ម៉េង វ៉ានចូវ មានទូរស័ព្ទ iPhone 7 Plus, iPad Pro និងកុំព្យូទ័រ MacBook Air ពេលត្រូវបានចាប់ខ្លួនដោយប៉ូលីសកាណាដា។ ក្រៅពីផលិតខាងលើ លោកស្រី ក៏មានប្រើទូរស័ព្ទ Huawei Mate 20 RS Porsche Edition ដែលជាផលិតផលតែមួយគត់របស់ក្រុមហ៊ុន Huawei ដែលត្រូវបានគេនាំមកជាមួយផលិតផល Apple ។ ខណៈនោះ មេធាវីរបស់លោកម៉េង ត្រូវបានគេរាយការណ៍ថាបានស្នើសុំចម្លងទិន្នន័យដែលរក្សាទុកនៅលើឧបករណ៍ដែលរឹបអូស។
ជាមួយនឹងព័ត៌មានមួយនេះ មានមនុស្សជាច្រើនឆ្ងល់ថា ហេតុអ្វីបានជាអ្នកស្រីសម្រេចចិត្តប្រើផលិតផល Apple បើឧបករណ៍ផ្ទាល់របស់ក្រុមហ៊ុន Huawei ត្រូវបានគេសន្មតថាល្អជាងមុនទៅហើយ? ប៉ុន្តែអ្នកគេយល់ថា អ្នកស្រីអាចប្រើវាដើម្បីសិក្សាពីគូប្រកួតប្រជែង ខណៈអ្នកលើកឡើងថា វាមិនមែនជាការស្វែងយល់អ្វីទេ ព្រោះទូរស័ព្ទអ្នកប្រើមិនមែនស៊េរីថ្មីទាន់ឆ្នាំ 2019 អ្វីទេ គឺជាទូរស័ព្ទ iPhone 7 Plus ហើយមួយទៀតគឺជាកុំព្យូទ័រ MacBook Air។
យ៉ាងណាមិញ គេមិនខ្វល់ទេថា អ្នកស្រី ម៉េង ជាអ្នកគាំទ្រផលិតផល Apple ឬអត់ ប៉ុន្តែអ្វីដែលជារឿងគួរឲ្យសំណើចនោះ ស្របពេលគេចាប់ខ្លួនអ្នកស្រី គេបានឃើញផលិតផលរបស់គូប្រកួតប្រជែងនៅជាមួយអ្នកស្រីទៅវិញ៕
ប្រភព៖ Mashable
