បន្ទាប់ក្រុមហ៊ុន Huawei និង ZTE ត្រូវអាមេរិកបិទភ្លើងខៀវ និងហាមពលរដ្ឋខ្លួនមិនឲ្យប្រើដែលទាក់ទងនឹងបញ្ហាសុវត្ថិភាពទិន្និន័យផ្ទាល់ខ្លួន និងមានហាងធំៗមួយចំនួនបន្តឈប់លក់ស្មាតហ្វូនរបស់ក្រុមហ៊ុនទាំងនោះ Xiaomi ដែលជាក្រុមហ៊ុនរបស់ចិនដែលហាក់កំពុងបានចិត្ត ហើយចង់បោះជំហានចូលទីផ្សារដ៏ធំមួយនេះនៅឆ្នាំក្រោយ។
តាមការបញ្ជាក់របស់លោក Wang Xiang នាយកក្រុមហ៊ុនទូរស័ព្ទចិនល្បីឈ្មោះមួយនេះ បាននិយាយទៅកាន់សារព័ត៌មានរ៉យទ័រ អំពីផែនការឆ្នាំ ២០១៩ របស់លោកថា Xiaomi មានបំណងចង់បោះជំហាននៅលើទីផ្សារអាមេរិក។ លោកថា “វាពិតជាមានភាពទាក់ទាញខ្លាំង” យើងនឹងចាប់ផ្ដើមអភិវឌ្ឍឧបករណ៍របស់ខ្លួនឲ្យឆ្លើយតបនឹងតម្រូវការអតិថិជននៅអាមេរិក។
លោក Xiang បានថ្លែងថាក្រុមហ៊ុន “សង្ឃឹមថា ខ្លួនអាចធ្វើអ្វីមួយ” យ៉ាងណា ពេលនេះអ្នកនាំពាក្យរបស់ Xiaomi មិនទាន់ឈានដល់កិច្ចព្រមព្រៀងចុងក្រោយជាមួយក្រុមហ៊ុនដៃគូសហការណាមួយនៅអាមេរិកនៅឡើយ។ ប្រសិនជោគជ័យនោះក្រុមហ៊ុនបច្ចេកវិទ្យាដ៏ធំរបស់ទីក្រុងប៉េកាំងនេះ នឹងរឹតតែអាចពង្រីកទីផ្សារស្មាតហ្វូនរបស់ខ្លួនបន្ថែម ក៏អាចជាការគំរាមដល់ដៃគូប្រកួតប្រជែងផងដែរ។ យ៉ាងណា ពេលនេះព្រឹទ្ធសភាសហរដ្ឋអាមេរិកបានស្នើបណ្ដាក្រុមហ៊ុនសេវាទូរស័ព្ទក្នុងស្រុក បញ្ឈប់កិច្ចសន្យារបស់ពួកគេជាមួយក្រុមហ៊ុន Huawei ខណៈ ZTE ក៏កំពុងប្រឈមភ្លើងក្រហមនៅទីផ្សារចិន បន្ទាប់ពីរំលោភកិច្ចព្រមព្រៀង ហើយក្រោយមកមិនព្រមសហការជាមួយមន្ត្រីអាមេរិក។ តាមរយៈការពង្រីកទីផ្សាររបស់ Xiaomi លើទឹកដីអាមេរិក ត្រូវអ្នកវិភាគលើកឡើងថា អាចនឹងជួយបង្កើនចំណែកទីផ្សារស្មាតហ្វូន Xiaomi មួយកម្រិតទៀត៕
