បន្ទាប់ពីបង្ហាញខ្លួនមួយរយៈធំ ពេលនេះ ទូរស័ព្ទ Nokia X71 ដែលជាស្មាតហ្វូនអេក្រង់លាតធំ 93% មានម៉ូតប្រជ្រុយលើកដំបូង របស់ក្រុមហ៊ុន Nokia បានចេញលក់ហើយសម្រាប់ទីផ្សារប្រទេសចិនក្នុងតម្លៃប្រមាណ 2,199 យ័ន (325 ដុល្លារ) សម្រាប់ម៉ូដែល 64GB និងមានតម្លៃ 2,699 យ័ន (400ដុល្លារ) សម្រាប់កំណែ 128GB ។
Nokia X71 ត្រូវបានរចនាឡើងជាមួយរចនាបថស៊ីវិល័យតាមគេ ជាមួយអេក្រង់ធំបែប Infinity-O ដូច Galaxy A8s និងទូរស័ព្ទរបស់ក្រុមហ៊ុន Huawei ដែរ លើផ្ទៃលាតសន្ធឹង 93% កាត់បន្ថយគែម ឲ្យនៅកាន់ខ្លីទំហំ 6.39 អ៊ីញ និងអាចបង្ហាញរូបភាពក្នុងកម្រិត Full HD+។ រូបរាងដ៏ទាក់ទាញរបស់នេះ ធ្វើឲ្យអ្នកគាំទ្រកម្ពុជា ជាច្រើនចាប់មានការអារម្មណ៍ និងទទ្ទឹងរង់ចាំវត្តមានរបស់វាមកដល់។
ទូរស័ព្ទ Nokia X71 បានបំពាក់កាមេរ៉ាខាងមុខទំហំ 16 មេហ្គាភិចសែល ផ្តល់អោយការថត Selfie កាន់តែប្រសើរ ហើយចំពោះកាមេរ៉ាខាងក្រោយវិញ រឹតតែពិសេសថែមទៀត ដោយក្រុមហ៊ុន HMD បានតម្លើងកាណុងកាមេរ៉ាចំនួន 3 គ្រាប់ សហការជាមួយ Zeiss ដដែល មានទីតាំងស្ថិតនៅចំកណ្តាល រាងបញ្ឈរចុះក្រោយ ដូចជំនាន់មុនៗដែរ ដោយគ្រាប់កាមេរ៉ាទី 1 មានទំហំធំ 48 មេហ្គាភិចសែល ជាកាមេរ៉ាគោល ឯគ្រាប់កាមេរ៉ាទី 2 មានទំហំ 8 មេហ្គាភិចសែល ជាលេន Wide សម្រាប់ថតប្លង់ទូលាយ ហើយកាមេរ៉ាមួយគ្រាប់ចុងក្រោយ គឺមានទំហំ 5 មេហ្គាភិចសែល ជាសេនស័រសម្រាប់ថតរូបបែបព្រាល។ ក្នុងនោះ វាក៏មានសេនស័រ សម្រាប់ស្កេនស្នាមម្រាមដៃ ស្ថិតនៅផ្នែកខាងក្រោយ ក្រោមកាមេរ៉ា ផងដែរ។
ចំពោះផ្នែកកម្លាំងម៉ាស៊ីន ស្មាតហ្វូននេះ ប្រើប្រាស់បន្ទះឈីប Snapdragon 660, មានរ៉េមទំហំ 6GB ជាមួយអង្គផ្ទុកទិន្នន័យទំហំ 128GB និងអាចបន្ថែមមេម៉ូរីក្រៅបានដល់ទំហំ 256GB។ វាជាផ្នែកមួយរបស់ Android One ដំណើរការដោយប្រព័ន្ធប្រតិបត្តិការ Android 9.0 Pie និងមានថាមពលថ្មទំហំ 3500 mAh ដោយទំហំប៉ុណ្ណេះ ការកំដរការប្រើប្រាស់ទូទៅ ឬលេងហ្គេម បានគួរសមដែរ និងមានដុំសាកថ្មលឿនកម្លាំង 18W នៅក្នុងប្រអប់ថែមទៀត។
ចំពោះតម្លៃ និងថ្ងៃចេញលក់សម្រាប់ទីផ្សារខ្មែរយើង នៅមិនទាន់ទទួលបានដំណឹងផ្លូវការណាមួយពីក្រុមហ៊ុន Nokia ប្រចាំកម្ពុជា ក៏ដូចជាក្រុមហ៊ុន KTH ដែលជាតំណាងចែកចាយផ្ដាច់មុខបង្ហើបអំពីគម្រោងនាំចូលស្មាតហ្វូននេះមកទីផ្សារកម្ពុជា យើងនៅឡើយទេ។ ប៉ុន្តែបើតាមការសន្និដ្ឋានស្មាតហ្វូននេះ ប្រហែលជាមានសង្ឃឹម មានវត្តមានក្នុងទីផ្សារខ្មែរយើងឆាប់ៗ បើយោងទៅតម្លៃចេញលក់នៅចិន ត្រឹម $325 ជាងនេះ ខណៈទីផ្សារយើងអាចថ្លៃជាងនេះបន្តិច៕
ប្រភព៖ Nokia
