បន្ទាប់ពីមានបញ្ហាមួយចំនួនលើប្រព័ន្ធ iOS ចាស់ កាលពីចុងខែមីនា ឆ្នាំ 2019 ក្រុមហ៊ុន Apple បានសម្រេចបញ្ចេញកំណែអាប់ដេតថ្មី iOS 12.2 ហើយ ដើម្បីជួសជុល កំហុសបន្តិចបន្តួច លើ iOS 12.1.4 រួមនឹងការនាំយករូប Emoji ថ្មី ចំនួន 4 រូប ដូចជារូបជ្រូកព្រៃ, ត្រីឆ្លាម, សត្វកវែង និងសត្វទីទុយ មកដាក់លើ iOS 12.2 នេះផងដែរ។
ក្រៅពីពង្រីងទៅលើប្រព័ន្ធសុវត្ថិភាព និងមុខងារជាច្រើនទៀត ក្រុមហ៊ុន Apple ក៏បានដាក់ចេញនូវមុខងារថ្មីមួយលើ iOS 12.2 នេះ ដែលអាចឲ្យអ្នកប្រើប្រាស់អាចដឹងពីពេលវេលាផុតកំណត់នៃការធានាថាសល់ប៉ុន្មានខែទៀត ព្រមនឹងអាចឲ្យលោកអ្នកឈប់ចាញ់បោកអ្នកលក់តាមហាង ពេលទៅទិញទូរស័ព្ទថ្មី តែត្រូវយកទូរស័ព្ទមួយទឹកមកបន្លំ ខណៈអ្នកមិនអាចមើលដឹង។
ចំណុចនេះមានន័យថា បើសិនយើងទៅទិញទូរស័ព្ទថ្មីពីប្រអប់ ខណៈទូរស័ព្ទនៅមិនទាន់ Activate រយៈពេលនៃការធានារបស់ Apple គឺនៅមួយឆ្នាំពេញ មិនទាន់ត្រូវបានកាត់ផងដែរ។ ករណីទិញទូរស័ព្ទ iPhone ថ្មី ប៉ុន្តែស្រាបតែការធានានៅសល់តិចខែ នោះបញ្ជាក់ថាទូរស័ព្ទនោះជាទូរស័ព្ទមួយទឹក ដែលត្រូវអ្នកលក់បន្លំបោកថាទូរស័ព្ទថ្មីហើយ។
ដើម្បីចូលទៅពិនិត្យមើលចំណុចនេះ លោកអ្នកអាចចូលទៅ Setting > General > About > Limited Warranty នោះវានឹងលោតចេញផ្ទាំងដែលបញ្ជាក់ពីការធានា និងពេលវេលាពីក្រុមហ៊ុន Apple ជាក់ជាមិនខាន៕
