ក្រោយស្ងាត់ក្នុងទីផ្សារមួយរយៈដោយផ្ដោតខ្លាំងតែទៅលើទីផ្សារកុំព្យូទ័រ កាលពីថ្ងៃទី 13 ខែកក្កដា នេះ ក្រុមហ៊ុន ASUS បានធ្វើបទបង្ហាញពីផលិតផលថ្មីចំនួន 3 ម៉ូឌែល មកកាន់ទីផ្សារប្រទេសកម្ពុជា មានសមត្ថភាពខ្លាំង តម្លៃសមរម្យ ជាពិសេសបំពាក់នូវថាមពលថ្មខ្លាំង សម្រាប់ផ្គាប់ចិត្តអ្នកដែលមានតម្រូវការប្រើប្រាស់ច្រើន។
លោក Robert Tu អ្នកគ្រប់គ្រងផលិតផលម៉ាកទូរសព្ទ័ដៃ ASUS ប្រចាំប្រទេសកម្ពុជា បានឲ្យដឹងថា៖ ស្មាតហ្វូនដែលក្រុមហ៊ុននាំមកសម្រាប់ទីផ្សារកម្ពុជា នៅពេលនេះរួមមានទូរស័ព្ទ ASUS Zenfone Max Pro M1, Zenfone 5 និង Zenfone 5z ។ ស្មាតហ្វូនទាំង ៣ ត្រូវបានបង្កើតឡើងមានលក្ខណៈសម្បត្តិផ្សេងគ្នា តម្លៃផ្សេងគ្នា ដែលអ្នកមានថវិកាល្មមៗអាចសម្រេចចិត្តទិញប្រើបាន។ ក្នុងចំណោមទូរស័ព្ទទាំង ៣ Zenfone Max Pro M1 គឺជាម៉ាកសញ្ញាផលិតផលមួយរបស់ ASUS ដែលបានចេញ 4 ជំនាន់ មិនដែលធ្វើឲ្យអ្នកប្រើប្រាស់ខកចិត្តម្តងណាឡើយ ជាពិសេស គឺសមត្ថភាព និងតម្លៃ។
លោកបានបន្តថា Zenfone Max Pro M1 ធ្វើតាមសិស្សច្បងជំនាន់មុនៗដូចគ្នា គឺពិតជាពិសេស សម្រាប់អ្នកប្រើប្រាស់ ដែលមានចំណូលមធ្យម ដែលចង់បាន ទូរសព្ទ័ដៃល្អមួយក្នុងការប្រើប្រាស់ទាំងអេក្រង់ រូបរាង ហើយជាពិសេសនោះ គឺសមត្ថភាពធ្វើការបានលឿន ប្រើប្រាស់ធ្វើការងារបានច្រើនមុខ មិនងាយគាំង និងមានថ្មប្រើប្រាស់បានយូរ ដែលមុខងារនិងតំរូវការទាំងនេះគឺត្រូវបានភ្ជាប់នៅលើ Zenfone Max Pro M1 នេះរួចជាស្រេច ដែលធ្វើឲ្យអ្នកប្រើប្រាស់អស់កង្វល់ទៅលើបញ្ហាទាំងនោះទៀតហើយ។
Zenfone Max Pro M1 គឺមានលក្ខណៈសម្បត្តិពិសេសៗជាច្រើន ដូចជា វាត្រូវបានបំពាក់ដោយ CPU ប្រភេទ Snapdragon 636 ដែលមានសមត្ថភាពខ្ពស់ ក្នុងការធ្វើការងារប្រចាំថ្ងៃ បានច្រើនមុខ ក្នុងពេលតែមួយ ហើយអាចលេងហ្គេម យ៉ាងរលូនទៀតផង ហើយពិសេសជាងនេះទៅទៀតគឺ វាត្រូវបានបំពាក់ដោយថ្មទំហំធំ ដល់ទៅ 5000mah ដែលលោកបានសង្កត់ធ្ងន់ថា វាអាចប្រើប្រាស់មើលវីដេអូ នៅលើ Youtube ដល់ទៅ 17 ម៉ោង ឯណោះ ហើយចំពោះការលេងហ្គេម Online ដែលកំពុងពេញនិយមដូចជា Rule of Survival វិញគឺបានដល់ទៅ 9 ម៉ោង ។
ម្យ៉ាងវិញទៀត ទូរសព្ទ័ដៃនេះ គឺមានអេក្រង់ស្ទើលាតដែលមានទំហំ 6 អ៊ីង ហើយអាចធ្វើការបង្ហាញក្នុងកម្រិត Full HD+ តែវាពិតជាងាយស្រួលមែនទែន ក្នុងការចាប់កាន់ ព្រោះតែវិស្វកររបស់ពួកយើង បានប្រើប្រាស់ រូបរាងទូរសព្ទ័ទំហំ 5.5 អ៊ីញ ជំនួសវិញ ដែលចំណុចនេះធ្វើអោយបទពិសោធន៍អ្នក ប្រើប្រាស់កើនឡើនមួយកម្រិតទៀត “ លោក Robert បានថ្លែងដូច្នេះ ។
លោកក៏បានបន្តទៀតដែរថា “ កាម៉េរាគឺជារឿងសំខាន់មួយដែរ សំរាប់អ្នកប្រើប្រាស់ បច្ចុប្បន្ន ដោយលើកនេះគឺ Zenfone Max Pro M1 គឺបានផ្តល់នូវកាម៉េរាចំនួនពីរ នៅខាងក្រោយដែលមានទំហំ 13MP និងនៅខាងមុខគឺមានទំហំ 8MP ដែលអាចធ្វើការចាប់យករូបភាព បានដិតច្បាស់ ហើយព្រមទាំងមានមុខងារ ថតបែប bokeh ដែលកំពុងពេញនិយមក្នុងពេលបច្ចុប្បន្នផងដែរ “ ។ ចំពោះទូរស័ព្ទ Zenfone 5 មានតម្លៃ 349$ និង Zenfone 5Z ដែលមានតម្លៃ 500$ ហើយ Zenfone Max Pro M1 មានតម្លៃសមរម្យមែនទែនត្រឹមតែ 179$៕
