បន្ទាប់ពីរង់ចាំអស់រយៈពេលជាយូរ ពេលនេះមានដំណឹងនៃការចេញលក់ទូរស័ព្ទ Galaxy A80 សម្រាប់ទីផ្សារកម្ពុជា យើងហើយនេះ បើតាមការបញ្ជាក់ឲ្យដឹងពីក្រុមហ៊ុន Samsung នៅស្រុកយើង ហើយចំពោះតម្លៃវិញ Admin មិនទាន់ច្បាស់ 100% ទេ ប៉ុន្តែវាអាចនៅចន្លោះ 600$ ទៅ 700$ ហើយអាចនឹងមានលក់នៅដើមខែក្រោយនេះ។
Galaxy A80 ជាស្មាតហ្វូនទី 1 ដែលបំពាក់ម៉ូតអេក្រង់ចុងក្រោយគេ និងប្រើកាមេរ៉ាត្រលបពីក្រោយមកខាងមុន ករណីចង់ថតដោយប្រើកាមេរ៉ាមុខ។ វាចំនុចទាក់ចិត្តបំផុតចំពោះការរចនាម៉ូតកាមេរ៉ាមុខរហូតចេញពីតួខ្លួន និងផ្ទៃអេក្រង់លាតស្ទើរតែគ្មាន សល់គែមបាន យ៉ាងទាក់ទាញ។ ទូរស័ព្ទនេះ មានអេក្រង់ទំហំ 6.7 អ៊ីញ អាចបង្ហាញរូបភាព ក្នុងកម្រិត FHD+ ជាប្រភេទ Super AMOLED ដោយក្រុមហ៊ុនឲ្យឈ្មោះថា New Infinity ហើយផ្នែកខាងក្រោយ ប្រើជាកញ្ចក់ 3D Glass ព័ទ្ធជុំវិញ ដោយវ័ន្ធធ្វើពីលោហៈធាតុ អញ្ចឹងវាបង្កើនសម្រស់ អោយមើលទៅ កាន់តែថ្លៃថ្នូរ (Premium) នៅក្នុងដៃបន្ថែមទៀត។
ចំនុចសំខាន់ជាងគេ គឺទៅលើកាមេរ៉ារបស់វាហ្នឹងឯង ដោយ Samsung បានរចនាយ៉ាងពិសេសតែម្តង ជាមួយកាណុងកាមេរ៉ាចំនួន 3 គ្រាប់ ដើរតួជាកាមេរ៉ាខាងមុខផង កាមេរ៉ាខាងក្រោយផង និយាយទៅ ក្រឡាប់ទៅវិញទៅមក ដូចការបើកភ្នែកម្ខាង បិទភ្នែកម្ខាង អញ្ចឹងឯង និងមានរំលេចឆ្នូតរង្វង់ពណ៌មាស ព័ន្ធជុំវិញ។ វាមានកាមេរ៉ាគោលទំហំ 48 មេហ្គាភិចសែល មានកម្រិត Aperture f/2.0 និងមានមុខងារទប់លំនឹង Super Steady Mode ដូចមានលើ S10 ដែរ។
កាមេរ៉ាមួយគ្រាប់ទៀត មានទំហំ 8 មេហ្គាភិចសែល ជាលេន Ultra-wide angle អាចថតវីដេអូក្នុងប្លង់ទូលាយបាន 123 ដឺក្រេ និងអាចថតរូប Selfie ជាមួយមិត្តភក្កិ ឬបងប្អូន បានចំនួនច្រើននាក់។ កាមេរ៉ាមួយចុងក្រោយគេ ជាប្រភេទ ToF ផ្តល់អោយការថតព្រាល បានកាន់តែពិសេស រួមបញ្ចូលមុខងារ Live Focus ថែមទៀត។ អ្នកនឹងឃើញមុខងារ មួយទៀតគឺ Era of Live ដែលអាចឆ្លាស់ កាមេរ៉ាទៅមក មុខក្រោយបាន ពេលថតវីដេអូ។
ស្មាតហ្វូននេះ មានកម្លាំងថាមពលថ្មទំហំ 3700mAh អាចទ្រទ្រង់កម្លាំងសាកបាន 25W ប៉ុន្តែសោកស្តាយមួយ វាមិនអាចសាកថ្ម ឥតខ្សែបានទេ។ ចំនុចមួយទៀត គឺវាដំណើរការ ដោយប្រព័ន្ធប្រតិបត្តិការណ៍ Android 9 Pie និងមានស្រោប One UI ថ្មី ធ្វើឲ្យអ្នកប្រើ កាន់តែពេញចិត្ត៕
