OPPO ដាក់ឲ្យធ្វើការ Pre-Order ទូរស័ព្ទ Find X នៅកម្ពុជា មានតម្លៃក្បែពាន់ដុល្លារ

       បន្ទាប់ធ្វើការសម្ពោធនៅស្រុកក្រៅមិនបានប៉ុន្មានថ្ងៃ កាលពីថ្ងៃទី ២០ ខែកក្កដា ឆ្នាំ ២០១៨ ក្រុមហ៊ុន OPPO ប្រចាំប្រទេសកម្ពុជា បានធ្វើការប្រកាសស្មាតហ្វូនលំដាប់កំពូលរបស់ខ្លួន OPPO Find X ដើម្បីឲ្យអតិថិជនធ្វើការ Pre-Order ជាមួយតម្លៃក្បែពាន់ដុល្លារ។

ក្នុងសន្និសីទសារព័ត៌មាននៅសណ្ឋាគារ The Great Duke ក្រុមហ៊ុន OPPO បានប្រាសឲ្យដឹងថា OPPO Find X គឺជា​ស្មា​ត​ហ្វូ​ន​ជំនាន់​ថ្មី និង​មាន​លក្ខ​ណះ​សម្បត្តិ​ប្លែក​ពី​ស្មា​ត​ហ្វូ​ន​ដទៃ ត្រូវបាន​ក្រុមហ៊ុន​រចនា​ឡើង​ជាមួយនឹង​អេក្រង់​បែប Panoramic មាន​ទំហំ 93.8% ធៀប​នឹង​តួខ្លួន​ទាំងមូល ដែល​គឺជា​កម្រិត​ធំជាងគេ​ដំបូងបង្អស់​ក្នុង​ឧស្សាហកម្ម​ទូរស័ព្ទ។

Find X មាន​បំពាក់​នូវ​បច្ចេកវិទ្យា​សាក​ថ្ម​លឿន VOOC, 3D Light Structure, រួម​នឹង​បច្ចេកវិទ្យា AI Beauty ដែលជា​បច្ចេកវិទ្យា​ច្នៃប្រឌិត​ថ្មី​បំផុត និង​បាន​បង្កើតឡើង​ដោយ OPPO ផ្ទាល់​តែម្តង។ ស្មា​ត​ហ្វូ​ន OPPO Find X រចនា​ឡើង​ដើម្បី​បំពេញតម្រូវការ​ឲ្យ​លើសពី​ការរំពឹងទុក​របស់​អតិថិជន។ ប្រណិត​ភាព​នៃ​ការ​ឌី​ហ្សា​ញ OPPO Find Xមានការ​ឌី​ហ្សា​ញ​ដ៏​ល្អ​ឯក ដែលមាន​អេក្រង់​លាត​ពេញទី កាមេរ៉ា​ទាំង​ខាងមុខ​និង​ខាងក្រោយ​ត្រូវបាន​បង្គាប់​ក្នុង​តួ​នៃ​ទូរស័ព្ទ ពេល​ត្រូវ​ការប្រើ​ទើប​វា​ងើប​ចេញមក។ ភាពល្អ​ឯក ឡូយ​និង​ថ្លៃថ្នូរ នៅពេលដែល​ក្នុង​ដៃ​របស់​អ្នក​កាន់​នូវ​ទូរស័ព្ទ​ស៊េរី​ទំនើប វា​ប្រៀបបាន​នឹង​កំពុងតែ​កាន់​នូវ​ដុំ​គុជ​ដ៏​មានតម្លៃ ដែល​បង្ហាញ​ឲ្យ​ឃើញ​ពី​ភាព​សាក​សម​ទៅនឹង​តួខ្លួន​របស់​អ្នកជំនួញ។ ដូច្នេះ​សម្រាប់​អ្នក​ដែល​ចង់​ប្រើប្រាស់​នូវ​ទូរស័ព្ទ​ដែល​សាក​សម​ទៅនឹង​តម្លៃ​ខ្លួន និង​ស៊ី​វិ​ល័យ​សូមកុំ​ភ្លេច OPPO Find X។

OPPO Find X ដំណើរការ​ដោយ​បន្ទះ​ឈី​ប Snapdragon 845 និង​មាន​អង្គ​ចងចាំ​ទំហំ 8GB មេម៉ូរី​ទំហំ 128GB ដែល​នេះ គឺជា​កម្លាំងចលករ​ដ៏​សំខាន់​ដែល​ជួយ​អោយ​ស្មា​ត​ហ្វូ​ន​នេះ​កាន់តែខ្លាំង។ ស្មា​ត​ហ្វូ​ន​នេះ ប្រើប្រាស់​នូវ​ប្រព័ន្ធ​កាមេរ៉ា​ភ្លោះ​ទំហំ 16MP+20MP sensors នៅ​ខាងក្រោយ​ជាមួយនឹង​មុខងារ OIS និង AI ផងដែរ។ សម្រាប់​កាមេរ៉ា​ខាងមុខ​របស់​ស្មា​ត​ហ្វូ​ន​នេះ​មាន​ទំហំ 25MP ហើយ​និង​មានការ​ប្រើប្រាស់​ជាមួយនឹង​មុខងារ 3D portrait lighting និង Omoji ទៀតផង។ ស្មា​ត​ហ្វូ​ន Oppo Find X ដំណើរការ​នូវ  ColorOS 5.1 AI Smart custom UI  នៅលើ​ប្រព័ន្ធ​ប្រតិបត្តិការ Android 8.1។

សម្រាប់ការ Pre-Order នឹងទទួលបាននៅ​ថ្ងៃទី 5 ខែសីហា ឆ្នាំ 2018 ខាងមុខនេះ នៅក្នុង​តម្លៃ 899$ ដោយមាន​ពីរ​ពណ៌​សម្រាប់​ជ្រើសរើស គឺ Bordeaux Red (ពណ៌​ក្រហម) និង Glacier Blue(ពណ៌​ខៀវ) ហើយ​ក្រុមហ៊ុន ក៏​នឹង​បន្ថែម​ការដូ​ជា​ស៊ុម​រូបថត​ឌីជីថល​ដ៏​ទាន់​សម័យមួយ​ផងដែរ៕