មានដំណឹងមកថា Nokia កំពុងញាប់ដៃផលិតផលស្មាតហ្វូនកាមេរ៉ា 48M យកគំរូបតាម Nokia Lumia 1020

ក្រោយ​ក្រុមហ៊ុន​ស្មា​ត​ហ្វូ​ន​ជាច្រើន​កំពុង​ប្រកួតប្រជែង​គ្នា​លើ​សមត្ថភាព​កាមេរ៉ា​ទូរស័ព្ទ ដោយ​អ្នកខ្លះ អាច Zoom រហូតដល់ 50 ដង ហើយ​ខ្លះ 60 ដង ពេលនេះ​មាន​ដំណឹង​អមដោយ​រូបភាព​បែកធ្លាយ​មក​ថា ក្រុមហ៊ុន Nokia ឯណោះ​វិញ ក៏​មិន​នៅ​ស្ងៀម​ដែរ ដោយ​ខ្លួន​កំពុង​ញាប់ដៃ ញាប់ជើង​អភិវឌ្ឍន៍​ស្មា​ត​ហ្វូ​ន​មួយ​មាន​សមត្ថភាព​កាមេរ៉ា​ខ្លាំង​យក​គំ​រូប​តាម  Nokia Lumia 1020 កាលពី​ជំនាន់​មុន​របស់ខ្លួន។

តាមរយៈ​រូបភាព​បែកធ្លាយ ដែល​ត្រូវបាន​ចុះផ្សាយ​ដោយ​គេហទំព័រ Gsmarena កាលពី​ថ្ងៃ​ម្សិលមិញ​នេះ បាន​បង្ហាញថា ស្មា​ត​ហ្វូ​ន​ស៊េរី​ថ្មី​មួយ​នេះ មានឈ្មោះ​កូដ​ហៅថា “Daredevil” ប៉ុន្តែ​ឈ្មោះ​ផ្លូវការ​នៅ​មិនទាន់​ដឹងថា​មានឈ្មោះ​អ្វី​ឲ្យ​ប្រាកដ​ទេ ហើយ​អ្វីដែល​ទាក់ទាញ​បំផុត គឺ​កាមេរ៉ា ផ្នែក​ខាងក្រោយ​មាន​រាង​ជា​រង្វង់ យក​ទម្រង់​ដូច Nokia Lumia 1020 ដែល​វា​មាន Sensor កាមេរ៉ា​ចំនួន 2 គ្រាប់ និង​ភ្លើង Flash LED មួយ។ កាមេរ៉ា​នេះ វា​បាន​ភ្ជាប់​មកជា​មួយ Sensor ដើម​ទំហំ​ធំ 48 MP ដោយនៅ​ផ្ទាំង​ម៉ឺ​នុយ Camera វា​អាច​ផ្លាស់ប្ដូរ ទៅកាន់​ការថត​បែប Wide-Angle បាន។ ដោយឡែក​ទំហំ​អេក្រង់ មិនត្រូវ​បាន​គេ​បញ្ជាក់​ទេ គ្រាន់តែ​ដឹងថា វា​ប្រើ​អេក្រង់​បែប ដំណក់ទឹក​ធ្លាក់។

ចំពោះ​សមត្ថភាព​ម៉ាស៊ីន​វិញ ស្មា​ត​ហ្វូ​ន​ស៊េរី​ថ្មី​មួយ​នេះ អាច​នឹង​ត្រូវបាន​បំពាក់​ដោយ បន្ទះ​ឈី​ប Snapdragon 710 ឬ Snapdragon 730 និង​ដំណើរការ​លើ​ប្រព័ន្ធ​ប្រតិបត្តិការ Android 9.0 Pie ចេញពី​ប្រអប់​ស្រាប់។ ក្រៅពីនេះ វា​ក៏​រន្ធ​ដា​ត​កាស 3.5mm រន្ធ​សាក​ថ្ម​ប្រភេទ USB Type-C ហើយ​បន្ថែម​នូវ​ប៊ូ​តុង​ដ៏​ពិសេស សម្រាប់​បើកមុខ​ងារ AI នៅ​ខាងឆ្វេង​ស្មា​ត​ហ្វូ​ន ថែម​ទៀតផង។ យ៉ាងណាមិញ ថ្ងៃ​ដាក់ចេញ​ជា​ផ្លូវការ​នៃ​ស្មា​ត​ហ្វូ​ន​នេះ មិនត្រូវ​បាន​គេ​បង្ហើប​ឲ្យ​ដឹង​ទេ ប៉ុន្តែ​បើតាម​សន្និដ្ឋាន Nokia អាច​នឹងដាក់​ចេញ​នៅ​ចុងឆ្នាំ​នេះ៕