លោក ស៊ុន ចាន់ថុល គ្រោងប្រើបច្ចេកទេសថ្មីបំផុត​បូបភក់បាតអាង ដើម្បីផលិតជាជីសរីរាង្គ

ខេត្តសៀមរាប៖ លោក ស៊ុន ចាន់ថុល ទេសរដ្ឋមន្រ្តី រដ្ឋមន្រ្តីក្រសួងសាធារណការ និងដឹកជញ្ជូន នៅ​ថ្ងៃទី១៦ ខែ​សីហា បានលើកឡើងថា ក្រសួងនឹងប្រើប្រាស់បច្ចេកទេស ដើម្បីបង្កើនសមត្ថ​ភាពបន្សុទ្ធ​ទឹក​កខ្វក់ឲ្យ​បាន​ច្រើន​​ទ្វេ​ដង និងបូបភក់បាតអាង ដើម្បីផលិតជាជីសរីរាង្គ នៅខេត្តសៀមរាប។

ការថ្លែងនេះ ក្នុងអំឡុងពេលលោកបានដឹកនាំគណៈប្រតិភូ និងមន្ត្រីជំនាញ​ចុះពិនិត្យស្ថាន​ភាពស្ថា​នីយប្រ​ព្រឹត្តិ​កម្ម​ទឹក​កខ្វក់ និងការគ្រប់គ្រង និងអភិវឌ្ឍបណ្ដាញប្រព័ន្ធលូទឹកកខ្វក់ នៅក្នុងក្រុងសៀមរាប ខេត្តសៀមរាប ដោយ​មាន​ការចូលរួមពីគណៈប្រតិភូក្រសួង ថ្នាក់ដឹកនាំ និងមន្ត្រីជំនាញជាច្រើនរូប។
ការពិនិត្យស្ថានភាពស្ថានីយប្រព្រឹត្តិកម្ម និងបណ្ដាញលូទឹកកខ្វក់នេះ ធ្វើឡើងដើម្បីពិនិត្យស្ថានភាព និងសមត្ថ​ភា​ព​ជាក់​ស្ដែង​របស់អាងដែលមានស្រាប់ ធៀបនឹងទំហំបរិមាណទឹកកខ្វក់​ដែ​លប​ញ្ចេញចោ​លពីប្រ​ភពនា​នានៅ​ក្នុង​ខេត្ត​សៀមរាប សំដៅពង្រីកសមត្ថភាពជាបណ្ដើរៗតាមផែនការ ដែលបានសិក្សារួច តាមរយៈការស្វែង​រកក្រុម​ហ៊ុន ឬដៃគូអភិវឌ្ឍ ក្នុងការអភិវឌ្ឍវិស័យនេះ។

លោកទេសរដ្ឋមន្ត្រីបានថ្លែងថា ​ក្រសួងមានទីតាំង និងទំហំដីគ្រប់គ្រាន់ក្នុងការគ្រប់​គ្រងកាក​សំណល់​ទឹកកខ្វក់​ទាំង​នេះ។ ជាក់ស្ដែង ក្រសួង​មានទំហំផ្ទៃដីនៅភាគខាងលិចក្រុងចំនួន ៣៨ ហិចតា ដែលបានសាងសង់​ស្ថានីយ​ប្រ​ព្រឹត្តិកម្មទឹកកខ្វក់រួចលើទំហំផ្ទៃដី២០ហិចតា។ ចំណែក ផ្ទៃដីបម្រុងនៅភាគខាងកើតក្រុង​មានចំនួន​ប្រមាណ​ជា​ង ៥០ហិចតា។

លើសពីនេះទៅទៀត ក្រសួងនឹងប្រើប្រាស់បច្ចេកទេស ដើម្បីបង្កើន​សមត្ថភា​ពបន្សុ​ទ្ធ​ទឹក​កខ្វក់ឱ្យបានច្រើន​ជាង​នេះ​ទ្វេ​ដង និងបូបភក់បាតអាងដើម្បីផលិតជាជីសរីរាង្គផងដែរ។
លោកថា ក្រសួងបានសហការជាមួយក្រុមហ៊ុន និងដៃគូអភិវឌ្ឍដូចជាធនាគារអភិវឌ្ឍន៍អាស៊ី និងធនាគារពិភ​ព​លោ​ក ក៏ដូចជាក្រុមហ៊ុនឯកជនមួយចំនួន សិក្សាផែនការមេប្រព័ន្ធគ្រប់គ្រងទឹកកខ្វក់ និងទឹកភ្លៀង​នៅទូទាំ​ងខេ​ត្ត​សៀ​មរាប ដើម្បីរក្សាបាននូវបរិស្ថានល្អ និងការពារការជន់លិចលង់ដោយសារទំនន់ទឹកភ្លៀង។

សូមបញ្ជាក់ថា បច្ចុប្បន្នខេត្តនេះមានស្ថានីយប្រព្រឹត្តិកម្មទឹកកខ្វក់មួយកន្លែង ដែលបច្ចុប្បន្នសមត្ថភាពច្រោះ​កាក​សំណល់ទឹកកខ្វក់ចំនួន៨.០០០ម៉ែត្រគូបក្នុងមួយថ្ងៃ និងមានម៉ាស៊ីនបូបទឹកកខ្វក់ចំនួន៣ កន្លែង ពោលគឺ​ម៉ាស៊ី​ន​មេ​មួយ​កន្លែង និងម៉ាស៊ីនរងចំនួន២ ដែលមានសមត្ថភាពបូបទឹក ៥៦.៣៨៦ម៉ែត្រគូបក្នុងមួយថ្ងៃ។

លើសពីនេះ បណ្ដាញលូគ្រប់គ្រងទឹកភ្លៀង និងទឹកកខ្វក់ជាច្រើនគីឡូម៉ែត្រត្រូវបានសាងសង់រួច ព្រមទាំងបាន​តភ្ជាប់​បណ្ដាញលូទឹកកខ្វក់ពីលំនៅឋានរបស់បងប្អូនប្រជាពលរដ្ឋ ចូលទៅក្នុងបណ្ដាញ​លូមេបាន​មួយចំនួន។

ទោះបីសមត្ថភាពផ្ទុកទឹកកខ្វក់បច្ចុប្បន្ន នៅមានកម្រិតក្ដី ក្រសួងមានផែនការមេរបស់ខ្លួន ដោយបង្កើន​សមត្ថ​ភាព​ច្រោះ​ទឹកកខ្វក់ឱ្យដល់ពី៥០.០០០ម៉ែត្រគូប ទៅ ៨០.០០០ម៉ែត្រគូបក្នុងមួយថ្ងៃនៅឆ្នាំ២០៤០ ដោយ​អនុវត្ត​តាម​ផែ​នការរយៈពេលខ្លី មធ្យម និងវែង ដូចបានកំណត់នៅក្នុងផែនការមេ៕