ភ្នំពេញ៖ រដ្ឋាភិបាលឥណ្ឌា នៅថ្ងៃទី ១៩មិថុនានេះ បានប្រកាសគាំទ្រគម្រោងអភិវឌ្ឍន៍ថ្មីចំនួន ១៨ ក្នុងក្របខ័ណ្ឌ កិច្ចសហប្រតិបត្តិការមេគង្គ-គង្គា សម្រាប់ឆ្នាំ២០១៩-២០២០ ដើម្បីជួយអភិវឌ្ឍន៍កម្ពុជា លើកកម្ពស់ជីវភាព និងសុខមាលភាពរបស់ប្រជាពលរដ្ឋ។
ការប្រកាសនេះ ក្នុងពិធីចុះហត្ថលេខាលើអនុស្សរណៈនៃការយោគយល់ស្តីពីជំនួយឥតសំណងរបស់សាធារណរដ្ឋឥណ្ឌា សម្រាប់ការអនុវត្តគម្រោងឆាប់ទទួលបានផលនៅកម្ពុជារវាងលោកស្រី Manika Jain ឯកអគ្គរដ្ឋទូតនៃសាធារណរដ្ឋឥណ្ឌាប្រចាំកម្ពុជា និងលោក លុយ ដាវីត រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ។
ក្នុងនោះ បានចុះហត្ថលេខាលើគម្រោងចំនួន ៦សម្រាប់ក្រសួងសុខាភិបាល ៤គម្រោង ក្រសួងអភិវឌ្ឍន៍ជនបទ ក្រសួងធនធានទឹក និងឧតុនិយមមាន ២គម្រោង ក្រសួងប្រៃយស៍នី និងទូគមនាគមន៍មាន ២គម្រោង ក្រសួងកិច្ចការនារី២គម្រោង ក្រសួងបរិស្ថានមាន១គម្រោង និងក្រសួងវប្បធម៌ និងវិចិត្រសិល្បៈមាន១គម្រោង។
លោក លុយ ដាវីត រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិបានថ្លែងថា គម្រោងខ្នាតតូចទាំងនេះមានសារៈសំខាន់ចំពោះកម្ពុជា ក្នុងការបង្កើតលទ្ធផលរូបី ដើម្បីលើកកម្ពស់ជីវភាព និងសុខមាលភាពរបស់ប្រជាជនកម្ពុជា។
លោកបន្តថា សមិទ្ធផលជាក់ស្តែងមួយ ដែលបានកើតចេញពីកិច្ចសហប្រតិបត្តិការនេះគឺ “សារមន្ទីរវាយនភ័ណ្ឌប្រពៃណីអាស៊ី” ត្រូវបានសម្ពោធដាក់ឲ្យប្រើប្រាស់នៅឆ្នាំ២០១៤ នៅខេត្តសៀមរាប ប្រទេសកម្ពុជា។ សារមន្ទីរនេះ ជាការបង្ហាញយ៉ាងច្បាស់លាស់អំពីសក្តានុពលនៃកិច្ចសហប្រតិបត្តិការ ក្នុងចំណោមបណ្តាប្រទេសមេគង្គ-គង្គាទាំង៦ ក្នុងការថែរក្សាអារ្យធម៌ និងកេរ្តិ៍ដំណែលវប្បធម៌។
គួររំលឹកថា សាធារណរដ្ឋឥណ្ឌា គឺជាប្រទេសដំបូងគេបង្អស់ ដែលបានយល់ព្រមចូលរួមជាមួយបណ្តាប្រទេសមេគង្គ ក្នុងការបង្កើតក្របខ័ណ្ឌកិច្ចសហប្រតិបត្តិការមេគង្គដំបូងគេ ដែលបច្ចុប្បន្ន ហៅថា «កិច្ចសហប្រតិបត្តិការមេគង្គ-គង្គា»។
ក្នុងនោះ ចាប់តាំងពីការចាប់ផ្តើមគម្រោងឆាប់ទទួលបានផល ក្រោមកិច្ចសហប្រតិបត្តិការមេគង្គ-គង្គា នៅឆ្នាំ២០១៥ មក កម្ពុជាទទួលបានគម្រោងសរុបចំនួន ៣៤ ដែលមានវិសាលភាពគ្របដណ្តប់ លើសកម្មភាពកិច្ចសហប្រតិបត្តិការ ក្នុងវិស័យ សុខាភិបាល កសិកម្ម អប់រំ បរិស្ថាន ការអភិវឌ្ឍជំនាញ ការផ្តល់សិទ្ធិអំណាចដល់ស្ត្រី ការអភិវឌ្ឍជនបទ ធនធានទឹក និងបច្ចេកទេសព័ត៌មានវិទ្យា៕
